బాబు గుట్టు రట్టు చేస్తా: భూమా

కర్నూలు: తెలుగుదేశం పార్టీ అధ్యక్షుడు నారా చంద్రబాబునాయుడుపై ఆ పార్టీ నుంచి బయటకు వచ్చిన భూమానాగిరెడ్డి ఎదురుదాడికి దిగారు. తనపై అసత్య ఆరోపణలు చేయిస్తే చంద్రబాబు గుట్టు రట్టు చేస్తానని ఆయన సోమవారం మీడియా ప్రతినిధులతో అన్నారు. చిల్లర నేతలతో చంద్రబాబు తనపై ఆరోపణలు చేయిస్తున్నారని ఆయన విమర్శించారు. తనపై అనవసరంగా నిందలు వేయడం మానుకోవాలని ఆయన సూచించారు.

చంద్రబాబు మోచేతి నీళ్లు తాగేవారు తనపై విమర్శలు చేస్తున్నారని ఆయన అన్నారు. పార్టీపై చంద్రబాబుకు పట్టు లేదని, అందుకే పార్టీ సర్వనాశనమైందని ఆయన అన్నారు. ఇబ్బందులను తట్టుకోలేకనే తెలుగుదేశం పార్టీ నుంచి బయటకు వచ్చామని ఆయన చెప్పారు. భూమా నాగిరెడ్డితో పాటు ఆయన సతీమణి శోభా నాగిరెడ్డి కూడా తెలుగుదేశం పార్టీకి రాజీనామా చేసిన విషయం తెలిసిందే.