సమైక్యాంధ్ర పార్టీలతోనే పొత్తు: సిపిఎం

హైదరాబాద్: రాష్ట్ర విభజనను కోరుకునే పార్టీలతో పొత్తు ఉండదని సిపిఎం రాష్ట్ర కార్యదర్శి బి.వి. రాఘవులు చెప్పారు. సిపిఎం రాష్ట్ర కమిటీ సమావేశాలు జరుగుతున్న నేపథ్యంలో ఆయన సోమవారం మీడియా ప్రతినిధులతో మాట్లాడారు. తెలంగాణ రాష్ట్ర సమితి (తెరాస)తో సంబంధాలను బట్టే తెలుగుదేశం పార్టీతో రాజకీయ అవగాహనపై తాము నిర్ణయం తీసుకుంటామని ఆయన చెప్పారు. తాము సమైక్యాంధ్రకే కట్టుబడి ఉన్నామని, సమైక్యాంధ్రను కోరుకునే పార్టీలతోనే రాజకీయ అవగాహనకు వస్తామని ఆయన అన్నారు.

వచ్చే ఎన్నికల్లో పొత్తులపై ఆగస్టు 15వ తేదీ తర్వాతనే నిర్ణయానికి వస్తామని ఆయన చెప్పారు. ప్రభుత్వ వ్యతిరేక ఓటు చీలకుండా ఎన్నికల సమయంలో ఆలోచిస్తామని ఆయన చెప్పారు. తెలుగుదేశం పార్టీని ఓడించేందుకు తాము 2004 ఎన్నికల్లో పరస్పర పోటీని నివారించామని, అదే రీతిలో వచ్చే ఎన్నికల్లో కాంగ్రెసును ఓడించేందుకు వ్యవహరించాల్సి ఉంటుందని ఆయన అన్నారు.