కెసిఆర్ మంతనాలు అబద్ధం: టిడిపి

హైదరాబాద్: పొత్తుపై తమ పార్టీ అధ్యక్షుడు నారా చంద్రబాబునాయుడితో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు ఫోన్ లో మాట్లాడినట్లు వచ్చిన వార్తలో నిజం లేదని తెలుగుదేశం పార్టీ నాయకుడు అల్లాడి రాజ్ కుమార్ చెప్పారు. ఉద్దేశ్యపూర్వకంగానే కొందరు ఇటువంటి వార్తలను ప్రచారం చేస్తున్నారని ఆయన సోమవారం మీడియా ప్రతినిధులతో అన్నారు. తెరాసపై పొత్తు ప్రసక్తే లేదని ఆయన అన్నారు. తెరాసతో తెలుగుదేశం పార్టీ పొత్తు పెట్టుకుంటున్నట్లు వస్తున్న వార్తల్లో కుట్ర ఉందని ఆయన అన్నారు.

తాను తెలుగుదేశం పార్టీని వీడిపోయే ప్రసక్తే లేదని ఆయన స్పష్టం చేశారు. తాను గత 48 ఏళ్లుగా ఎన్టీ రామారావు కుటుంబానికి సన్నిహితంగా ఉంటున్నానని, ఇప్పుడు వీడిపోయే ప్రశ్నే లేదని ఆయన అన్నారు. తాను చంద్రబాబుతో ఫోనులో మాట్లాడినట్లు ఆయన తెలిపారు. తాను తెలుగుదేశం పార్టీకి రాజీనామా చేసి చిరంజీవి పార్టీలో చేరుతున్నట్లు జరుగుతున్న ప్రచారం అవాస్తవమని ఆయన అన్నారు.