ఆ ఇద్దరిపై దేవేందర్ ధ్వజం

హైదరాబాద్: తెలుగుదేశం పార్టీ అధ్యక్షుడు నారా చంద్రబాబునాయుడు, ముఖ్యమంత్రి డాక్టర్ వైయస్ రాజశేఖర రెడ్డి ప్రజాస్వామ్యాన్ని అపహాస్యం చేస్తున్నారని మాజీ మంత్రి టి. దేవేందర్ గౌడ్ విమర్శించారు. ప్రజలను ఓటర్లుగా మార్చేసి తమ పబ్బం గడుపుకుంటున్నారని ఆయన మంగళవారం మీడియా ప్రతినిధుల సమావేశంలో అన్నారు. వీరిద్దరు రాజకీయాలను భ్రష్టు పట్టిస్తున్నారని ఆయన అన్నారు. రాష్ట్రాన్ని దోచుకుంటూ డబ్బులు సంపాదించి తిరిగి ఎన్నికల్లో ఖర్చు పెడుతున్నారని, దీనివల్ల పేదలు ఎన్నికల్లో పోటీ చేయలేని వాతావరణం ఏర్పడిందని ఆయన అన్నారు.

కొన్ని సంక్షేమ కార్యక్రమాలను చేపట్టి ముఖ్యమంత్రి అదే అభివృద్ధి అని ప్రచారం చేసుకుంటున్నారని ఆయన అన్నారు. తెలుగుదేశం పార్టీలో ఉన్నప్పుడు తనకు ఇబ్బందులెదురైనా సంక్షేమ యాత్ర చేపట్టానని, సాగునీటి ప్రాజెక్టుల కోసం ఉద్యమాలు చేపట్టానని, తన సహచరులు పార్టీ నుంచి ఇబ్బందులు ఎదురైనా తనతో కలిసి వచ్చారని ఆయన అన్నారు. ఈ కార్యక్రమాలు చేపడుతున్నప్పుడు తనకేదో ఉద్దేశం ఉందని ప్రచారం చేయడం తనను బాధించిందని ఆయన చెప్పారు.