తెలంగాణ ప్రకటిస్తే మద్దతు: కెసిఆర్

హైదరాబాద్: తెలంగాణ రాష్ట్ర ఏర్పాటుకు ప్రక్రియను ప్రారంభిస్తామని ప్రకటిస్తే యుపిఎకు మద్దతిస్తామని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు చెప్పారు. తెలంగాణ రాష్ట్ర ఏర్పాటుకు ప్రక్రియను ప్రారంభిస్తామని ప్రధాని డాక్టర్ మన్మోహన్ సింగ్ స్వయంగా ప్రకటించాలని ఆయన మంగళవారం మీడియా ప్రతినిధులతో చెప్పారు. తనకు కేంద్ర మంత్రి శరద్ పవార్ ఫోన్ చేసి మద్దతు కోరారని, తాను అదే విషయం చెప్పానని ఆయన చెప్పారు. తిరిగి సాయంత్రం ఫోన్ చేస్తానని శరద్ పవార్ చెప్పినట్లు ఆయన తెలిపారు.

యుపిఎకు వామపక్షాలు మద్దతు ఉపసంహరించుకున్నందున తెలంగాణ రాష్ట్ర ఏర్పాటు ప్రక్రియను ప్రారంభించాలని ఆయన డిమాండ్ చేశారు. తెలంగాణపై కాంగ్రెసు నిజస్వరూపం ఇప్పుడు తెలిసే అవకాశం ఉందని ఆయన అన్నారు. తెలంగాణపై ప్రధాని ప్రకటన చేయకపోతే యుపిఎ ప్రభుత్వాన్ని కూల్చడానికి శక్తివంచన లేకుండా కృషి చేస్తామని ఆయన చెప్పారు. తెరాసకు ఇద్దరు లోకసభ సభ్యులున్నారు. తెలుగుదేశం పార్టీ తెలంగాణకు అనుకూలంగా నిర్ణయం తీసుకుంటే పొత్తుపై అప్పుడు ఆలోచిస్తామని కెసిఆర్ చెప్పారు.