హీరో కృష్ణ స్టూడియో వద్ద ధర్నా

హైదరాబాద్: సినీ నటుడు కృష్ణకు చెందిన పద్మాలయ స్టూడియో ముందు తెలంగాణ రాష్ట్ర సమితి (తెరాస) నాయకులు, కార్యకర్తలు బుధవారం ధర్నా చేశారు. పద్మాలయ స్టూడియోకు కట్టబెట్టిన భూములను వెనక్కి తీసుకోవాలని డిమాండ్ చేస్తూ వారు ధర్నా చేశారు. పద్మాలయ స్టూడియోలోకి చొచ్చుకుపోవడానికి తెరాస కార్యకర్తలు ప్రయత్నించారు. వారిని అడ్డుకోవడానికి పోలీసులు ప్రయత్నించారు. దీంతో తోపులాట చోటు చేసుకుంది. ఈ పరిస్థితిలో ఉద్రిక్త వాతావరణం నెలకొంది.

సినీ స్టూడియోలకు కేటాయించిన భూములను ఇతర ప్రయోజనాలకు వాడుకుంటున్నారని, కొందరు అమ్ముకుంటున్నారని తెరాస నాయకులు ఆరోపించారు. ఆ భూములను స్వాధీనం చేసుకుని పేదలకు పంచుతామని వారు హెచ్చరించారు. ధర్నాలో పాల్గొన్న తెరాస శాసనసభ్యులు హరీష్ రావు, రామలింగారెడ్డి, నాయకుడు నాయని నర్సింహారెడ్డి పోలీసులు అరెస్టు చేశారు. వారి వాహనాన్ని అడ్డుకోవడానికి కార్యకర్తలు ప్రయత్నించారు.