బాబు యాత్రకు వంద రోజులు

హైదరాబాద్: తెలుగుదేశం పార్టీ అధ్యక్షుడు నారా చంద్రబాబునాయుడు మీ కోసం యాత్ర వంద రోజులకు చేరుకుంది. ఈ యాత్రను 150 రోజులు చేపట్టాలని చంద్రబాబు నిర్ణయించుకున్నారు. ఈ ఏడాది ఏప్రిల్ 21వ తేదీన చిత్తూరు జిల్లా చంద్రగిరిలో యాత్ర ప్రారంభమైంది. ఈ యాత్ర ఇప్పటి వరకు 21 జిల్లాల్లో 9,632 కిలోమీటర్లు సాగింది. ప్రజల కష్టాలు తెలుసుకునేందుకు ఆయన మీ కోసం యాత్రను చేపట్టారు. రాష్ట్రంలోని 129 శాసనసభా నియోజకవర్గాల్లో సాగింది. యాత్ర పూర్తయ్యే లోపు అన్ని జిల్లాల్లో పర్యటించాలనేది చంద్రబాబు ఉద్దేశం.

ఈ యాత్ర ఇప్పటి వరకు రెండు దఫాలుగా సాగింది. తెలంగాణలో ఉప ఎన్నికలు జరిగినప్పుడు మొదటి సారి యాత్రకు చంద్రబాబు విరామం ఇచ్చారు. యుపిఎ ప్రభుత్వ బలపరీక్ష సందర్భంగా రెండో సారి ఆయన విరామం ఇచ్చారు. మూడో సారి ప్రస్తుతం సిపిఎం నాయకుడు హరికిషన్ సింగ్ సుర్జీత్ అంత్యక్రియలకు హాజరు కావడానికి ఆయన విరామం ఇచ్చారు. మీకోసం యాత్ర అనంతపురం జిల్లాలో ముగుస్తుంది. యాత్ర ముగింపు సందర్భంగా అనంతపురంలో భారీ బహిరంగ సభను ఏర్పాటు చేయాలని అనుకుంటున్నారు.