మహేష్ బాబు ఫ్యాన్స్ రక్తదానం

హైదరాబాద్: తెలుగు సినీ హీరో ప్రిన్స్ మహేష్ బాబు అభిమానులు సేవా కార్యక్రమాలు చేపట్టడానికి రాజకీయాలకు సంబంధం లేదని రాష్ట్ర ఆరోగ్య మంత్రి గల్లా అరుణకుమారి చెప్పారు. మహేష్ బాబు జన్మదిన వేడుకల్లో భాగంగా ఆయన అభిమానులు హైదరాబాదులోని నారాయణగుడాలో ఏర్పాటు చేసిన రక్తదాన శిబిరాన్ని ఆమె సోమవారం ప్రారంభించారు.

సూపర్ స్టార్ కృష్ణ, మహేష్ బాబు అభిమానులు చాలా కాలంగా సేవా కార్యక్రమాలు చేస్తున్నారని, ఇందులో భాగంగానే మహేష్ అభిమానులు ఈ రక్తదాన శిబిరాన్ని ఏర్పాటు చేశారని ఆమె అన్నారు. గత కొంత కాలంగా మహేష్ బాబు అభిమానులు సేవా కార్యక్రమాలను ఉధృతం చేసిన విషయం తెలిసిందే. చిరంజీవి రాజకీయాల్లోకి వస్తున్న నేపథ్యంలో కాంగ్రెస్ మహేష్ బాబును ఎన్నికల్లో ఉపయోగించుకోవాలని యోచిస్తున్నట్లు వార్తలు వస్తున్నాయి. ఈ మధ్య మహేష్ బాబు తండ్రి సూపర్ స్టార్ కృష్ణ ముఖ్యమంత్రి డాక్టర్ వైయస్ రాజశేఖర రెడ్డిని కలిశారు.