చిరంజీవిపై విజయశాంతి చిర్రుబుర్రు

హైదరాబాద్: మెగాస్టార్ చిరంజీవిపై తల్లి తెలంగాణ పార్టీ వ్యవస్థాపక అధ్యక్షురాలు విజయశాంతి చిటపటలాడారు. రైతులు ఎదుర్కొంటున్న ఎరువుల కొరతపై మాట్లాడని చిరంజీవి ప్రజా సమస్యలను ఎలా పరిష్కరిస్తారని ఆమె సోమవారం మీడియా ప్రతినిధులతో అన్నారు. చిరంజీవి తెలంగాణకు అనుకూలంగా నిర్ణయం తీసుకోలేరని, చిరంజీవికి తెలంగాణ పట్ల చిత్తశుద్ధి లేదని ఆమె అన్నారు.

మీడియాపైన కూడా ఆమె చిర్రుబుర్రులాడారు. రాజకీయాల్లోకే రాని చిరంజీవికి మీడియా అంత ప్రాధాన్యం ఎందుకు ఇస్తోందని ఆమె ప్రశ్నించారు. నకిలీ రైతులు, ఎరువులతో తెలంగాణ రైతులు సతమవుతుంటే చిరంజీవి నోరు విప్పలేదని, రైతుల ఆత్మహత్యలపై మాట్లాడలేదని ఆమె అన్నారు. చిరంజీవి రాజకీయాల్లోకి వచ్చి నోరు విప్పిన తర్వాత, విధివిధానాల గురించి మాట్లాడిన తర్వాత ఏమైనా మాట్లాడుతామని ఆమె అన్నారు.