చిరంజీవి సునామీ: హరిరామజోగయ్య

హైదరాబాద్: రాజకీయాల్లో మెగాస్టార్ చిరంజీవి సునామీ సృష్టిస్తారని కాంగ్రెస్ పార్లమెంటు సభ్యుడు చేగొండి హరిరామజోగయ్య అభిప్రాయపడ్డారు. తాను ఈ నెల 17వ తేదీన కాంగ్రెసు పార్టీకి రాజీనామా చేస్తానని ఆయన సోమవారం ఒక ప్రైవేట్ టీవీ చానెల్ ప్రతినిధితో అన్నారు. రాష్ట్రంలో తెలుగుదేశం పార్టీ తుడిచి పెట్టుకుపోతుందని, కాంగ్రెసుకు చిరంజీవి పార్టీకి మధ్యనే పోటీ ఉంటుందని ఆయన అన్నారు. రాష్ట్ర శాసనసభ ఎన్నికల్లో చిరంజీవి దుమారం రేపుతారని, అత్యధిక సీట్లు గెలుచుకుంటారని ఆయన అన్నారు.

చిరంజీవి నిర్ణయం మేరకే పార్టీలో తన పాత్ర ఉంటుందని ఆయన అన్నారు. కాంగ్రెసు పార్టీ అవినీతిలో కూరుకుపోయిందని ఆయన అన్నారు. ముందు చిరంజీవి ప్రజల్లోకి వెళ్తారని, ప్రజా స్పందనను చూసిన తర్వాతనే ఇతర పార్టీలతో పొత్తులపై చిరంజీవి ఆలోచిస్తారని ఆయన చెప్పారు. చిరంజీవి విపరీతమైన ప్రజా స్పందన లభిస్తుందని ఆయన అన్నారు. ఆదివారం అర్థరాత్రి తర్వాత జరిగిన చిరంజీవి పార్టీ కార్యాలయ ప్రారంభ కార్యక్రమంలో హరిరామజోగయ్య కూడా పాల్గొన్నారు.