కుటుంబ సభ్యులతో చిరు బర్త్ డే

హైదరాబాద్: రాజకీయాల్లోకి అడుగు పెట్టిన మెగాస్టార్ చిరంజీవి శుక్రవారం తన జన్మదిన వేడుకలను కుటుంబ సభ్యుల మధ్యనే జరుపుకున్నారు. తన జన్మదినం రోజు తాను తమ తల్లి అంజనాదేవితో గడుపుతానని, ఈ సందర్భంగా అభిమానులు హైదరాబాదుకు రావద్దని ఆయన ఇప్పటికే చెప్పారు. దీంతో అభిమానులు రాష్ట్రంలోని పలు ప్రాంతాల్లో చిరంజీవి జన్మదిన వేడుకలను వివిధ పద్ధతుల్లో నిర్వహించారు.

కొన్ని చోట్ల వారు బర్త్ డే కేక్ కట్ చేసి జన్మదిన వేడుకలు జరిపారు. పలు చోట్ల పండ్ల పంపిణీ చేశారు. రక్తదాన శిబిరాలు నిర్వహించారు. ఈ నెల 26వ తేదీన తిరుపతిలో జరిగే బహిరంగ సభ పూర్తి స్థాయి ఏర్పాట్లు జరుగుతున్నాయి. చిరంజీవి బావ మరిది అల్లు అరవింద్ ప్రతి రోజు అవిలాల వేదిక వద్ద పనులను పర్యవేక్షిస్తున్నారు. ఈ నెల 24వ తేదీన చిరంజీవి సోదరుడు పవన్ కళ్యాణ్ అవిలాల మైదానం ఏర్పాట్లను పరిశీలిస్తారు. చిరంజీవి ఈ నెల 26వ తేదీన తొలుత తిరుపతిలోని జాపాలి తీర్థంలో ఆంజనేయ స్వామిని దర్శించుకుంటారు. ఆ తర్వాత తిరుమల శ్రీవేంటేశ్వరస్వామిని దర్శించుకుంటారు. సాయంత్రం నాలుగున్నర గంటల తర్వాత బహిరంగ సభ ప్రారంభమవుతుంది. ఈ సందర్భంగా ర్యాలీ నిర్వహించాలా, వద్దా అనే విషయంపై ఆలోచన చేస్తున్నారు.