చిరంజీవితో కలిసి నడిచే మిత్రులు

హైదరాబాద్: చిరంజీవి ప్రజారాజ్యం పార్టీ లోక్ సత్తా, వామపక్షాలతో పొత్తుకు సిద్ధంగా ఉన్నట్లు తెలుస్తోంది. చిరంజీవి పర్యటన పూర్తి చేసి ప్రజాస్పందనను చూసిన తర్వాతనే ఇతర పార్టీలతో పొత్తులపై ఆలోచిస్తామని ఆ పార్టీ నాయకులు కొంత కాలంగా చెబుతూ వస్తున్నారు. అయితే, లోక్ సత్తాతో, వామపక్షాలతో పొత్తు పెట్టుకుంటామని ప్రజారాజ్యం అధికార ప్రతినిధి డాక్టర్ మిత్రా ఒక ప్రైవేట్ తెలుగు టీవీ చానెల్ ప్రతినిధితో చెప్పారు.

సోమవారం జరిగిన పార్టీ కార్యవర్గ సమావేశంలో చిరంజీవి పార్టీతో పొత్తు పెట్టుకునే విషయంపై జయప్రకాష్ నారాయణ నేతృత్వంలోని లోక్ సత్తా చర్చించింది. నిజాయితీతో కూడిన రాజకీయాలతో ముందుకు వచ్చే వారితో పొత్తు పెట్టుకోవాలని ఆ పార్టీ నిర్ణయించింది. మౌలిక భావజాలానికి భంగకరం కాకుండా కొత్త రాజకీయానికి దోహదపడే పార్టీతో పొత్తు పెట్టుకోవాలని ఆ పార్టీ ఒక అభిప్రాయానికి వచ్చింది. అయితే నవంబరులో సంస్థాగత ఎన్నికలు పూర్తయ్యాకే పొత్తుల గురించి ఆలోచించాలని పార్టీ నిర్ణయించింది.

కాగా, చిరంజీవి ప్రజారాజ్యంతో పొత్తు విషయమై సిపిఎం ఈ నెల 3వ తేదీన చర్చించనుంది. మొదటి నుంచి చిరంజీవి వామపక్షాలతో కలిసి పనిచేయడానికి ఇష్టపడుతున్నారు. తెలుగుదేశం పార్టీతో పొత్తు పెట్టుకోవాలా, చిరంజీవితో కలిసి నడవాలా అనే విషయంపై సిపిఎం ఈ నెల 3వ తేదీ సమావేశం చర్చించే అవకాశం ఉంది. కాగా, సిపిఐ మొదటి నుంచి చిరంజీవికి అనుకూలంగానే ప్రతిస్పందిస్తూ వస్తున్నది. తెలుగుదేశం, కాంగ్రెస్ లకు ప్రత్యామ్నాయంగా మూడో ప్రత్యామ్నాయాన్ని ప్రోత్సహించాలని ఆ పార్టీ భావిస్తోంది. ఇందులో భాగంగానే చిరంజీవి ప్రజారాజ్యంతో ఆ పార్టీ కలిసి పనిచేసే అవకాశం ఉంది.