ప్రజారాజ్యం చిరు గాలే: వెంకయ్య

నెల్లూరు: చిరంజీవి నాయకత్వంలోని ప్రజారాజ్యం చిరుగాలే కాని పెనుగాలి కాదని భారతీయ జనతా పార్టీ (బిజెపి) సీనియర్ నాయకుడు ఎం. వెంకయ్యనాయుడు వ్యాఖ్యానించారు. చిరంజీవికి రాష్ట్ర రాజకీయాల్లో నెగ్గగలిగే పొలిటికల్ గ్రామర్ లేదని ఆయన నెల్లూరులో మీడియా ప్రతినిధుల సమావేశంలో వ్యాఖ్యానించారు. చిరంజీవికి సినీ గ్లామర్ ఉందే గానీ పోలిటికల్ గ్రామర్ లేదని ఆయన వ్యాఖ్యానించారు.

వచ్చే ఎన్నికల్లో ఏ పార్టీకి కూడా తగిన మెజారిటీ రాదని ఆయన జోస్యం చెప్పారు. కాంగ్రెసుకు గానీ, ఇతర ప్రతిపక్షాలకు గానీ తగిన సీట్లు రావని ఆయన అన్నారు. తమకు 230 సీట్లు వస్తాయని చెబుతున్న కాంగ్రెసు మిగతా సీట్ల గురించి ఏం చెబుతుందని ఆయన అడిగారు. పొత్తులు లేకుండా ఏ పార్టీ కూడా మెజారిటీ సాధించలేదని ఆయన అభిప్రాయపడ్డారు. కార్యకర్తల్లో ఆత్మవిశ్వాసం నింపడానికే తమకు అత్యధిక సీట్లు వస్తాయని పార్టీలు చెప్పుకుంటున్నాయని ఆయన అన్నారు.