మార్పు తెస్తా: చిరంజీవి హామీ

హైదరాబాద్: తన నుంచి ప్రజలు ఆశిస్తున్న మార్పును తప్పకుండా తెస్తానని ప్రజారాజ్యం అధినేత చిరంజీవి అన్నారు. కడప, వరంగల్, నెల్లూరు, పొట్టి శ్రీరాములు జిల్లాల నుంచి వచ్చిన అభిమానులను ఆయన సోమవారం సాయంత్రం ఇమేజ్ గార్డెన్స్ లో కలుసుకున్నారు. కుటుంబ భారాన్ని భుజాలపై మోసే పెద్ద కొడుకుగా రాష్ట్రానికి చేయూత అందిస్తానని ఆయన చెప్పారు. రాష్ట్రాన్ని దేశంలోనే అగ్రగామిగా తీర్చి దిద్దుతానని ఆయన చెప్పారు.

సమాజం నిరంతరం మారుతూ ఉంటుందని, ఇప్పటి వరకు మార్పు వచ్చిందని, తాను ఈ సమాజంలో మంచి మార్పునకు దోహదం చేస్తానని, అందుకు యువకులు సహకరించాలని ఆయన అన్నారు. యువకుల ఉత్సాహం చూస్తుంటే తాను తప్పకుండా మార్పు తేగలననే విశ్వాసం కుదురుతోందని ఆయన అన్నారు. యువత కోరుకునే మెరుగైన సమాజం కోసం తమ పార్టీ పాటు పడుతుందని, యువతకు పార్టీలో పెద్ద పీట వేస్తామని ఆయన చెప్పారు. చిరంజీవి రాష్ట్ర పర్యటన తేదీలు ఖరారయ్యాయని, త్వరలో వెల్లడిస్తామని ప్రజారాజ్యం అధికార ప్రతినిధి డాక్టర్ మిత్రా చెప్పారు.