ఇక షారూఖ్ పై శివసేన ధ్వజం

ముంబయి: ఇంత వరకు జయాబచ్చన్ మహారాష్ట్ర నవనిర్మాణసమితి (ఎంఎన్ఎస్) లక్ష్యం చేసుకోగా ఇప్పుడు శివసేన బాలీవుడ్ బాద్షా షారూఖ్ ఖాన్ ను లక్ష్యం చేసుకుంది. తాను ఢిల్లీవాలాను అని చేసిన వ్యాఖ్యపై శివసేన అధినేత బాల్ థాకరే నిప్పులు చెరిగారు. షారూఖ్ ఖాన్ ఢిల్లీ వాలా అయితే మహారాష్ట్రకు ఎందుకు వచ్చారని ఆయన శివసేన అధికారిక పత్రిక సామ్నాలో రాసిన సంపాదకీయంలో ప్రశ్నించారు. షారూఖ్ ఖాన్ పేరును, సంపదను పొందడానికి మహారాష్ట్రకు వచ్చారని, తన కోరికలు నెరవేరగానే షారూఖ్ ఖాన్ తాను ఎక్కడి నుంచి వచ్చానో గుర్తు చేసుకుంటున్నారని, తమ స్వరాష్ట్రంపై ఏ విధమైన వ్యాఖ్యలను కూడా మరాఠీలు సహించరని థాకరే అన్నారు.

షారూఖ్ కు ప్రాంతీయ భావన ఉన్నప్పుడు అదే ఎంతో కొంత తమకు ఉంటే తప్పేమిటని ఆయన ప్రశ్నించారు. గత ఆరు దశాబ్దాలుగా దక్షిణ భారతదేశంలో హిందీ వ్యతిరేకోద్యమం సాగుతోందని, తమిళనాడులో హిందీ సినిమాలపై, హిందీ వార్తలపై నిషేధం ఉందని, అస్సాంలో హిందీ మాట్లాడిన వారిని హత్య చేశారని ఆయన గుర్తు చేశారు. తాము యుపి నుంచో, బీహార్ నుంచో వచ్చామని చెప్పుకుంటున్నవారు హిందీ బ్యానర్ ను వదులుకోరని ఆయన అన్నారు. అమితాబ్ బచ్చన్ ఈ ప్రాంతానికి గానీ, భాషకు గానీ చెందినవారు కారని, తన కళకు వచ్చే సరికి ప్రాంతీయత, భాష వంటి అడ్డుగోడలు పని చేయడం లేదని, అమితాబ్ అంత గొప్ప నటుడని ఆయన అన్నారు. అయితే అమితాబ్ భార్య తాము ఉత్తరప్రదేశ్ వాసులమని అంటే దాన్ని ఎలా అర్థం చేసుకోవాలని ఆయన అడిగారు.