నేను నవ్వితే బాబుకు బాధ: వైయస్

హైదరాబాద్: తాను నవ్వితే తెలుగుదేశం పార్టీ అధ్యక్షుడు నారా చంద్రబాబునాయుడుకు బాధ, తాను సంతోషంగా ఉంటే బాధ అని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. ఒక ప్రైవేట్ టీవీ చానెల్ నిర్వహించిన కార్యక్రమంలో ఆయన మాట్లాడారు. తాను ఎప్పుడూ ఏడుస్తూ ఉండాలని చంద్రబాబు ఉద్దేశమని ఆయన అన్నారు. రైతులు బాగుంటే చంద్రబాబుకు బాధ అని, రాష్ట్రంలో వర్షాలు పడితే బాధ అని ఆయన అన్నారు. కాస్తా వర్షాలు ఆలస్యమయ్యే సరికి మీ కోసం యాత్ర చేపట్టారని, చంద్రబాబు ఎక్కడ యాత్ర ముగించుకుంటే అక్కడ వర్షాలు పడుతూ వచ్చాయని ఆయన అన్నారు. గత ఐదేళ్లలో వర్షాలు పడుతున్నాయని ఆయన అన్నారు. చంద్రబాబు ప్రతిదాన్నీ రాజకీయం చేయాలని అనుకుంటున్నారని ఆయన వ్యాఖ్యానించారు.

సిపిఎం రాష్ట్ర కార్యదర్శి రాఘవులుపై కూడా ఆయన విరుచుకుపడ్డారు. తామంటే రాఘవులుకు కోపం ఏర్పడవచ్చు, చంద్రబాబంటే ప్రేమ ఎందుకు పెరిగిందో తెలియడం లేదని ఆయన అన్నారు. చంద్రబాబు ఆలోచనా ధోరణి ఏ మాత్రం మారలేదని, అయినా రాఘవులు చంద్రబాబును ఎందుకు ప్రేమిస్తున్నారని ఆయన అన్నారు. తాము కరెంట్ చార్జీలను పెంచలేదని ఆయన చెప్పారు. చంద్రబాబు 9 పాలనలో ఐదు సార్లు కరెంట్ చార్జీలు పెంచారని ఆయన విమర్శించారు. ఇటువంటి స్థితిలో రాఘవులు తెలుగుదేశం పార్టీని ప్రేమించడమేమిటని ఆయన అన్నారు. తామంటే ఇష్టం లేకపోతే రాఘవులు తటస్థంగా ఉండాలని, కానీ సిద్ధాంతాలను కూడా పక్కన పెట్టి చంద్రబాబుతో కలవడానికి సిద్ధపడడం సరి కాదని ఆయన అన్నారు.