చిరు మ్యాన్ ఆఫ్ మీడియా :మిత్రా

హైదరాబాద్: తాము వ్యక్తిగత విమర్శలకు ప్రతిస్పందించబోమని ప్రజారాజ్యం అధికార ప్రతినిధి డాక్టర్ మిత్రా అన్నారు. చిరంజీవికి సినీ గ్లామరే తప్ప పొలిటికల్ గ్లామర్ లేదని బిజెపి నాయకుడు ఎం. వెంకయ్యనాయుడు చేసిన వ్యాఖ్యపై ఆయన మంగళవారం సాయంత్రం ఆ విధంగా స్పందించారు. సినీ నిర్మాత తమ్మారెడ్డి భరద్వాజ, పిసిసి అధ్యక్షుడు డి. శ్రీనివాస్ చేసిన విమర్శలపై కూడా ఆయన ఆ సమాధానమే చెప్పారు. తెలుగు మహిళ అధ్యక్షురాలు రోజా చేసిన విమర్శలకు వ్యతిరేకంగా చిరంజీవి అభిమానులు ఆందోళన చేయడం కూడా సరి కాదని ఆయన అన్నారు. పార్టీ వ్యవహారాలపై చిరంజీవి కాకుండా అధికార ప్రతినిధులే మాట్లాడడాన్ని ప్రస్తావిస్తూ మీడియా ముందుకు రావాలంటే భయమా అని ఒక విలేకరి అడగ్గా ఇది హాస్యాస్పదమని, చిరంజీవి మ్యాన్ ఆఫ్ మీడియా అని మిత్రా అన్నారు. అన్ని విషయాలు చిరంజీవే వివరించడం సాధ్యం కాదని ఆయన అన్నారు.

సభ్యత్వం తీసుకుంటేనే ప్రజారాజ్యం పార్టీలో అధికారికంగా చేరినట్లని ఆయన స్పష్టం చేశారు. ప్రస్తుతం పార్టీలో చేరుతున్నట్లు ప్రకటించినవారంతా పార్టీ సభ్యులు కారని, తమ ఆసక్తిని ప్రదర్శించడానికి వచ్చినవారే అవుతారని ఆయన అన్నారు. మాజీ పోలీసు అధికారులు, ముఖ్యంగా వివిధ కాల్పుల్లో పాల్గొన్నవారు పార్టీలో చేరడానికి వస్తున్న విషయాన్ని విలేకరులు ప్రస్తావించగా ఆయన ఆ విధంగా చెప్పారు. పూర్తిగా విచారణ జరిపిన తర్వాతనే పార్టీలో చేర్చుకుంటామని ఆయన చెప్పారు.