టిడిపి విజయానికి పని చేస్తా: బాలకృష్ణ

హైదరాబాద్: వచ్చే ఎన్నికల్లో తెలుగుదేశం పార్టీ (టిడిపి) గెలుపు కోసం పూర్తి స్థాయిలో పని చేస్తానని సినీ నటుడు, స్వర్గీయ ఎన్టీ రామారావు కుమారుడు నందమూరి బాలకృష్ణ చెప్పారు. హైదరాబాదులోని బసవతారకం క్యాన్సర్ ఆస్పత్రిలో జరిగిన అన్నదాన కార్యక్రమంలో ఆయన గురువారంనాడు పాల్గొన్నారు. యువత అంతా తెలుగుదేశం వెంటే ఉంటారని ఆయన ధీమా వ్యక్తం చేశారు. యువత కోసం తెలుగుదేశం పార్టీ చేపట్టినన్ని కార్యక్రమాలు మరే పార్టీ చేపట్టలేదని ఆయన ఆయన చెప్పారు.

గుంటూరులో జరిగే యువగర్జన సదస్సులో తాను పాల్గొంటానని ఆయన చెప్పారు. తన తండ్రి ఆశయాల కోసం తాను కృషి చేస్తానని ఆయన అన్నారు. మానవ సేవే మాధవ సేవగా తన తండ్రి భావించారని, పేదలకు మేలు చేసే లక్ష్యం తో పని చేశారని, అందుకు తాను కృషి చేస్తానని ఆయన అన్నారు. తెలుగుదేశం ప్రభుత్వ హయాంలో ఐటి వంటి రంగాలు అభివృద్ధి చెంది, రాష్ట్రానికి చెందిన యువకులు ఎంతో మంది విదేశాల్లో గౌరవప్రదంగా జీవిస్తున్నారని, రాష్ట్రంలోని ఇంటికొక్కరికి ఉద్యోగం లభించిందంటే అది తెలుగుదేశం కృషేనని ఆయన అన్నారు. తెలుగుదేశం పార్టీ కోసం తాను చేపట్టబోయే ప్రచార కార్యక్రమ వివరాలను ఇప్పుడే వెల్లడించలేనని ఆయన అన్నారు.