అణు సరఫరాకు చట్టబద్దత లేదు: బుష్

న్యూఢిల్లీ: భారత్‌కు అణు ఇంధనాన్ని సరఫరా చేస్తామని ఇచ్చిన హామీ చట్టబద్దమైనదేమీ కాదని అమెరికా అధ్యక్షుడు జార్జి బుష్‌ అన్నారు. ఈ మేరకు ఆయన అమెరికా కాంగ్రెస్‌ సభ్యులకు లేఖ రాసినట్లు తెలుస్తోంది. రాజకీయ ఒప్పందాలేవీ చట్టపరిధిలోకి రావని, ఒప్పందంలోని ఆర్టికల్‌ 5(6) ప్రకారం భారత్‌కు అణు ఇంధనాన్ని సరఫరా చేసే హామీ రాజకీయ హామీ మాత్రమేనని ఆయన కాంగ్రెస్‌ సభ్యులనుద్దేశించి రాసిన లేఖలో బుష్‌ అన్నారు.

ఇప్పటికే అణు ఒప్పందాన్ని తీవ్రంగా వ్యతిరేకిస్తున్న భారత్‌లోని ప్రతిపక్ష పార్టీలు ఈ అంశాన్ని సీరియస్‌గా తీసుకునే అవకాశం కన్పిస్తోంది. ఈ విషయంపై అటు అమెరికా అధికారులుగానీ, ఇటు భారత్‌ అధికారులుగానీ ఎటువంటి అధికారిక ప్రకటన చేయలేదు. అయితే ఈ విషయంపై భారత్ ఆమెరికాను స్పష్టతను కోరే అవకాశం ఉంది. బుష్ తాజా లేఖ తాము చేస్తున్న ఆరోపణలు నిజమని బయట పెట్టిందని భారతీయ జనతా పార్టీ (బిజెపి) అన్నది. అణు ఇంధనం విషయంలో ఒప్పందం వల్ల భారత్ సార్వభౌమత్వాన్ని కోల్పోతుందని తాము చెబుతున్న మాట నిజమేనని వెల్లడైందని బిజెపి అధ్యక్షుడు రాజ్ నాథ్ సింగ్ అన్నారు.