చిరు సభకూ ఆర్టీసి బస్సులిచ్చారు: డిఎస్

న్యూఢిల్లీ: ప్రజారాజ్యం పార్టీ అధినేత చిరంజీవి తిరుపతి సభకు కూడా ఆర్టీసి బస్సులు ఇచ్చిందని ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ చెప్పారు. అనంతపురం సోనియా గాంధీ సభకు ఆర్టీసి బస్సులు ఇవ్వడంపై వచ్చిన విమర్శలకు సమాధానంగా ఆయన శుక్రవారం మీడియా ప్రతినిధులతో ఆ విధంగా అన్నారు. తమ పార్టీ అధ్యక్షురాలు సోనియా గాంధీ కార్యక్రమాలకు అధికార దుర్వినియోగం జరగలేదని ఆయన స్పష్టం చేశారు. సోనియా సభకు లభించిన విశేష స్పందనను జీర్ణించుకోలేకనే విమర్శలు చేస్తున్నారని ఆయన వ్యాఖ్యానించారు.

త్వరలోనే పిసిసి కార్యవర్గాన్ని ప్రకటిస్తామని ఆయన చెప్పారు. భద్రతా కారణాల రీత్యానే సోనియాగాంధీకి వినతిపత్రం ఇవ్వడానికి అఖిల పక్ష రైతు నేతలను అనుమతించలేదని ఆయన చెప్పారు. ఎరువుల కొరతపై, రైతు సమస్యలపై సోనియా గాంధీకి అనంతపురం బహిరంగ సభలో వినతిపత్రం ఇవ్వడానికి బయలుదేరిన అఖిల పక్ష రైతు నేతలను పోలీసులు గురువారంనాడు గుత్తి వద్ద అరెస్టు చేసిన విషయం తెలిసిందే.