తెలంగాణపై స్పష్టత ఉంది: చిరంజీవి

హైదరాబాద్: తమకు తెలంగాణపై స్పష్టత ఉందని ప్రజారాజ్యం పార్టీ అధినేత చిరంజీవి అన్నారు. సోమవారంనాడు సిపిఎం నాయకురాలు మల్లు స్వరాజ్యం కూతురు కరుణ ప్రజారాజ్యం పార్టీలో చేరారు. తమకు అన్ని విషయాలపై స్పష్టత ఉందని చిరంజీవి అన్నారు. తమతో చేతులు కలపడానికి ముందుకు వచ్చే వారితో కలిసి పనిచేస్తామని ఆయన చెప్పారు. రాజకీయాల్లోకి రావాలంటే ఉద్యమాలే చేయనక్కరలేదని, రాజకీయాల్లోకి వచ్చిన తర్వాత ప్రజాసమస్యలపై పోరాడవచ్చునని ఆయన అన్నారు.

అభివృద్ధిపై కాంగ్రెస్ నాయకులతో బహిరంగ చర్చకు తాము సిద్ధమేనని ప్రజారాజ్యం పార్టీ నాయకుడు కెఎస్ఆర్ మూర్తి అన్నారు. చర్చకు ముఖ్యమంత్రి వస్తే తమ పార్టీ అధినేత చిరంజీవి వస్తారని, ఇతర నాయకులెవరైనా వస్తే తాను వస్తానని ఆయన చెప్పారు. తాము చేసిన అభివృద్ధిపై చర్చకు రావాలని మంత్రి ఆనం నారాయణ రెడ్డి ప్రజారాజ్యం పార్టీని సవాల్ చేశారు.