ముఖ్యమంత్రి చిరంజీవే: మిత్రా

హైదరాబాద్: తమ పార్టీ అధినేత చిరంజీవి ముఖ్యమంత్రి అవుతారని ప్రజారాజ్యం పార్టీ అధికార ప్రతినిధి డాక్టర్ మిత్రా ధీమా వ్యక్తం చేశారు. చిరంజీవికి ముఖ్యమంత్రి అయ్యే ఉద్దేశం ఉందని ఆయన అన్నారు. ప్రజలు కోరుకుంటే దళితుడే ముఖ్యమంత్రి అవుతారని చిరంజీవి చేసిన ప్రకటనకు తాము కట్టుబడి ఉన్నామని ఆయన అన్నారు. అందరితో చర్చించిన తర్వాత చిరంజీవి విధానాలు ప్రకటిస్తారని ఆయన చెప్పారు.

దళితుడు ముఖ్యమంత్రి కావాలని ప్రజలు ఎలా కోరుకుంటారని పిసిసి అధ్యక్షుడు డి. శ్రీనివాస్ వేసిన ప్రశ్నను ప్రస్తావిస్తూ సంభాషణ నుంచి భిన్న అర్థాలు తీసే ప్రయత్నం చేయరాదని ఆయన అన్నారు. ఓ సందర్భంలో చెప్పినదాన్ని ఆ మాట వరకు విడదీసి చూపకూడదని ఆయన అన్నారు.