తెలంగాణ ప్రజలకు మద్దతు: జానా

హైదరాబాద్: తెలంగాణ ప్రజల మనోభావాలకు తన మద్దతు ఉంటుందని రాష్ట్ర హోం మంత్రి కె. జానారెడ్డి అన్నారు. తెలంగాణ విమోచనోత్సవాన్ని సెప్టెంబర్ 17వ తేదీన ప్రభుత్వమే నిర్వహించాలని కోరుతానని ఆయన బుధవారం మీడియా ప్రతినిధులతో అన్నారు. నిజాం కాలం నాటి నిరంకుశ పాలన ఎదురైతే సర్దార్ పటేల్ లా మారుతానని ఆయన అన్నారు. తాను ఐక్య రాష్ట్రానికే ప్రాతినిధ్యం వహిస్తున్నానని, అయితే వివిధ ప్రాంతాల మనోభావాలను పరిగణనలోకి తీసుకోవాల్సి ఉంటుందని ఆయన అన్నారు.

నవ తెలంగాణ ప్రజా పార్టీ (ఎన్టీపిపి) కార్యాలయంలో ఆ పార్టీ నాయకులు జాతీయ పతాకను ఆవిష్కరించారు. తెలంగాణ రాష్ట్రం ఏర్పడినప్పుడే తెలంగాణ ప్రజలకు నిజమైన విమోచన అని ఆ పార్టీ నాయకులు ఈ సందర్భంగా అన్నారు. పార్టీ కార్యాలయంలో గాంధీ భవన్ లో పిసిసి అధ్యక్షుడు డి. శ్రీనివాస్ జాతీయ పతాకను ఆవిష్కరించారు. తెలంగాణలోని పలు ప్రాంతాల్లో బిజెపి, తెలంగాణ రాష్ట్ర సమితి, ఎన్టీపిపి, ఎబివిపి, టిఆర్ఎస్వీ జాతీయ పతాకను ఆవిష్కరించి తెలంగాణ విమోచన దినోత్సవాన్ని నిర్వహించుకున్నాయి.