సెప్టెంబర్ 17కు పవిత్రత: చిరంజీవి

హైదరాబాద్: అవకాశం వస్తే తెలంగాణ విమోచన దినోత్సవమైన సెప్టెంబర్ 17వ తేదీకి సముచిత స్థానం లభించేలా చూస్తానని ప్రజారాజ్యం పార్టీ అధినేత చిరంజీవి అన్నారు. సెప్టెంబర్ 17 తెలంగాణ విమోచన దినోత్సవం సందర్భంగా ఆయన బుధవారం స్వాతంత్ర్య సమరయోధుల చేత పార్టీ కార్యాలయంలో జాతీయ పతాకను ఆవిష్కరింపజేశారు. ఈ సందర్భంగా 20 మంది స్వాతంత్ర్య సమరయోధులను సత్కరించారు. నారాయణరావు పవార్ చేత జాతీయ పతాకను ఆవిష్కరింపజేశారు. నిజాం నవాబుపై బాంబులతో దాడి చేసినవారిలో నారాయణరావు పవార్ ఒక్కరు. సెప్టెంబర్ 17 పవిత్రతను కాపాడుతామని చిరంజీవి అన్నారు.

సెప్టెంబర్ 17వ తేదీని ప్రభుత్వం అధికారికంగా గుర్తించాలని లోకసత్తా అధ్యక్షుడు జయప్రకాష్ నారాయణ అన్నారు. ఆ రోజు సెలవు ప్రకటించాల్సిన అవసరం లేదు గానీ ఆ రోజు ప్రత్యేకతను ప్రభుత్వం అధికారికంగా గుర్తించాల్సి ఉంటుందని ఆయన అన్నారు. సెప్టెంబర్ 17న ప్రభుత్వమే అధికారికంగా ఉత్సవాలు నిర్వహించాలని తెలంగాణ రాష్ట్ర సమితి (తెరాస) శాసనసభ్యుడు హరీష్ రావు అన్నారు.