తెలంగాణ పార్టీలను ఏకం చేస్తా: కెసిఆర్

సిద్ధిపేట: తెలంగాణవాదుల ఐక్యతకు తానే చొరవ చూపుతానని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు చెప్పారు. మెదక్ జిల్లా సిద్ధిపేటలో తెలంగాణ సాయుధ పోరాట వీరుల అతి పెద్ద స్థూపాన్ని ఆయన బుధవారం ఆవిష్కరించారు. తెలంగాణ శక్తులను, వ్యక్తులను ఏకం చేస్తానని ఆయన చెప్పారు. తెలంగాణ రాష్ట్రాన్ని సాధించి తీరుతామని ఆయన ధీమా వ్యక్తం చేశారు.

తెలంగాణ రాష్ట్రం సాధించే దాకా తాను విశ్రమించబోనని ఆయన చెప్పారు. తెలంగాణ కోసం కెసిఆర్ తల నరుక్కుంటడు గానీ తల వంచడని ఆయన అన్నారు. నీళ్ల కోసం, కరెంట్ కోసం ఇక్కడి ప్రజలు తెలంగాణను కోరుకుంటున్నారని ఆయన అన్నారు. ఈ కార్యక్రమంలో ప్రొఫెసర్ జయశంకర్, విద్యాసాగరరావు, తదితరులు పాల్గొన్నారు.