ఇల్లు ధ్వంసం చేస్తాం: బాలయ్య ఫ్యాన్స్

కడప: తమ అభిమాన నటుడిపై ప్రజారాజ్యం పార్టీ నాయకుడు సి. రామచంద్రయ్య చేసిన వ్యాఖ్యలను నిరసిస్తూ బాలకృష్ణ అభిమానులు గురువారం రెండో రోజు కూడా ధర్నాకు దిగారు. రామచంద్రయ్య ఇంటి ముందు వారు ఈ ధర్నా చేశారు. అనుచిత వ్యాఖ్యలకు క్షమాపణలు చెప్పకపోతే రామచంద్రయ్య ఇంటిని ధ్వంసం చేస్తామని వారు హెచ్చరిస్తున్నారు. రామచంద్రయ్యకు వ్యతిరేకంగా నినాదాలు చేశారు.

రామచంద్రయ్య ఇంటి ముందు బుధవారం వారు ధర్నా చేశారు. బాలకృష్ణను అవమానించే విధంగా ప్రకటన చేసిన రామచంద్రయ్య బేషరతు క్షమాపణ చెప్పాలని వారు డిమాండ్ చేశారు. క్షమాపణ చెప్పకపోతే తమ ఆందోళనను ఉధృతం చేస్తామని వారన్నారు. అయితే తానేమీ తప్పుగా మాట్లాడలేదని రామచంద్రయ్య బుధవారం వివరణ ఇచ్చారు. సినీ నటుడు బాలకృష్ణపై తాను తప్పుగా ఏమీ మాట్లాడలేదని ప్రజారాజ్యం నాయకుడు సి. రామచంద్రయ్య అన్నారు. చిరంజీవి స్వర్గీయ ఎన్టీఆర్ స్ఫూర్తితో ప్రజారాజ్యం పార్టీని పెట్టారు కాబట్టి ఎన్టీఆర్ ఆశయాల సాధనకు ఆ పార్టీలో చేరాలని లేదా మరో పార్టీ పెట్టాలని తాను నందమూరి వారసులకు సలహా ఇచ్చినట్లు ఆయన తెలిపారు.

స్వర్గీయ ఎన్టీఆర్ ఆశయాలకు తిలోదకాలిచ్చిన తెలుగుదేశం పార్టీకి సేవలందించడం వల్ల ప్రయోజనం ఉండదని నందమూరి వారసులకు తాను సలహా ఇచ్చానని ఆయన చెప్పారు. కేంద్ర మంత్రి, స్వర్గీయ ఎన్టీఆర్ కూతురు పురంధరేశ్వరి కూడా అదే మాట అంటున్నారని, పురంధరేశ్వరి మాటలనే తాను చెప్పానని ఆయన వివరించారు.