విజయశాంతిపై మాట్లాడను: చిరు

హైదరాబాద్: తల్లి తెలంగాణ పార్టీ వ్యవస్థాపక అధ్యక్షురాలు విజయశాంతి, తెలుగు మహిళ అధ్యక్షురాలు రోజా తనపై చేసిన వ్యాఖ్యలపై స్పందించబోనని ప్రజారాజ్యం అధినేత చిరంజీవి అన్నారు. అటువంటి విమర్శలు మామూలేనని, వారి విమర్శలపై తమవారు ఎవరైనా ప్రతిస్పందిస్తారని ఆయన సోమవారం మీడియా ప్రతినిధులతో చెప్పారు. రక్తనిధితో లబ్ధి పొందిన ఏ ఒక్కర్ని అడిగినా వారి విమర్శలకు సమాధానం చెబుతారని ఆయన అన్నారు. చిరంజీవి రక్తనిధి అందించిన సేవలను ప్రశంసిస్తూ గతంలో రోజా చేసిన వ్యాఖ్యలతో కూడిన సిడిని ఆయన మీడియా ప్రతినిధులకు ఇచ్చారు.

చేనేత కార్మికుల సమస్యలపై, వారి సాధకబాధకాలపై అధ్యయనం చేసేందుకు మాజీ పార్లమెంటు సభ్యుడు కె.ఎస్.ఆర్. మూర్తి నేతృత్వంలో ఒక కమిటీని వేస్తున్నట్లు చిరంజీవి ప్రకటించారు. మరికొందరు సభ్యులను ఈ కమిటీలో వేస్తామని ఆయన చెప్పారు. ఈ కమిటీ పది, పదిహేను రోజుల్లో నివేదిక సమర్పిస్తుందని ఆయన చెప్పారు. నివేదికను పరిశీలించి, ఆ అంశాలను ఎన్నికల ప్రణాళికలో చేరుస్తామని ఆయన చెప్పారు. చేనేత కార్మికులకు అన్ని విధాలా మేలు చేశామని ముఖ్యమంత్రి వైయస్ రాజశేఖర రెడ్డి చేసిన ప్రకటనను ప్రస్తావించగా చేయాల్సినంత చేయడం లేదని చిరంజీవి చెప్పారు.