అన్నపై అనిల్ అంబానీ దావా

ముంబయి: అంబానీ సోదరుల మధ్య వైరం మరోసారి వెలుగులోకి వచ్చింది. తన సోదరుడు, రిలయన్స్ ఇండస్ట్రీస్ అధినేత ముఖేష్ అంబానీపై అనిల్ అంబానీ గ్రూప్ 10 వేల కోట్ల రూపాయలకు పరువు నష్టం దావా వేసింది. కొన్ని వారాల క్రితం న్యూయార్క్ టైమ్స్ లో ముఖేష్ చేసిన వ్యాఖ్యలపై అనిల్ ఈ దావా వేసినట్లు సమాచారం. ఈ విషయంపై మాట్లాడడానికి ముఖేష్ అంబానీకి చెందిన రిలయన్స్ ఇండస్ట్రీస్ అధికార ప్రతినిధి మాట్లడడానికి నిరాకరించారు.

నెల క్రితం ముంబయి హైకోర్టులో అనిల్ అంబానీ ఈ కేసు వేసినట్లు తెలుస్తోంది. దాదాపు 200 పేజీల పిటిషన్ ను ఆయన దాఖలు చేసినట్లు సమాచారం. అయితే ఆ పిటిషన్ ప్రతి లభ్యం కావడం లేదు. ఈ వివరాలను తెలుసుకోవడానికి ప్రయత్నించిన మీడియా ప్రతినిధులకు అనిల్ అంబానీ గ్రూపు నుంచి ఎవరూ అందుబాటులోకి రావడం లేదు.