చిరుతో బాబుకే నష్టం: ఎమ్మెస్సార్

కరీంనగర్: కమ్యూనిస్టులతో పాటు ఏ పార్టీకి కూడా సిద్ధాంతాలు లేవని కాంగ్రెస్ సీనియర్ శాసనసభ్యుడు ఎం. సత్యనారాయణరావు అన్నారు. చిన్నప్పుడు తాను కూడా కమ్యూనిస్టునేనని, ఇప్పుడు ఎవరికీ సిద్ధాంతాలు లేవని ఆయన గురువారం మీడియా ప్రతినిధులతో అన్నారు. వచ్చే ఎన్నికల్లో సిపిఐ ప్రజారాజ్యంతో, సిపిఎం తెలుగుదేశం పార్టీతో జత కడ్తాయని ఆయన చెప్పారు. వచ్చే ఎన్నికల్లో తాను పోటీ చేయబోనని, యువకులకు అవకాశం ఇవ్వాలనే ఉద్దేశంతో ఈ నిర్ణయం తీసుకున్నానని, రాజకీయాల్లోకి తన వారసులెవరూ రాబోరని ఆయన అన్నారు.

2009 లోగా తెలంగాణ రాష్ట్రం ఏర్పడుతుందని ఆయన అభిప్రాయపడ్డారు. చిరంజీవి ప్రజారాజ్యం పార్టీ వల్ల కాంగ్రెసుకు ఏ విధమైన నష్టం లేదని, పైగా లాభం జరుగుతుందని ఆయన అన్నారు. తన 58 ఏళ్ల రాజకీయానుభవంతో ఈ విషయం చెబుతున్నట్లు ఆయన తెలిపారు. ప్రజారాజ్యం వల్ల తెలుగుదేశం పార్టీకే నష్టం జరుగుతుందని ఆయన అన్నారు.