లగడపాటి అరెస్టుకు తెరాస డిమాండ్

నిజామాబాద్: విజయవాడ కాంగ్రెస్ పార్టీ పార్లమెంటు సభ్యుడు లగడపాటి రాజగోపాల్ ను అరెస్టు చేయాలని తెలంగాణ రాష్ట్ర సమితి (తెరాస) ప్రధాన కార్యదర్శి కె.టి. రామారావు డిమాండ్ చేశారు. లగడపాటి రాజగోపాల్ పై కేసు పెట్టాలని, రాజగోపాల్ ను అరెస్టు చేయాలని ఆయన డిమాండ్ చేశారు. రాజగోపాల్ ను అరెస్టు చేయకపోతే తాము ఆందోళనకు దిగుతామని ఆయన హెచ్చరించారు. కేంద్ర మంత్రి ప్రణబ్ ముఖర్జీ కాన్వాయ్ ని తెరాస కార్యకర్తలు అడ్డుకోవడానికి ప్రయత్నించారు. ఈ సమయంలో లగడపాటి రాజగోపాల్ కారు తెరాస కార్యకర్తను ఢీకొట్టింది. దీంతో తెరాస కార్యకర్త గాయపడ్డాడు.

తెలంగాణపై నివేదిక సమర్పించడానికి యుపిఎ ప్రణబ్ ముఖర్జీ నేతృత్వంలో కమిటీ వేసింది. ఈ కమిటీ వివిధ పార్టీల అభిప్రాయాలు సేకరించి నివేదిక సమర్పించాల్సి ఉంది. నాలుగున్నర ఏళ్లుగా నివేదిక సమర్పించకపోవడంతో గురువారం నిజామాబాద్ పర్యటనకు వచ్చిన ప్రణబ్ ముఖర్జీ ఎదుట తెరాస కార్యకర్తలు నిరసన వ్యక్తం చేయడానికి ప్రయత్నించారు. కావాలని రాజగోపాల్ కారును తమ పార్టీ కార్యకర్త కాలి మీదుగా పోనిచ్చారని తెరాస ప్రధాన కార్యదర్శి కెటి రామారావు అంటున్నారు.