మన్మోహన్ పై బుష్ ప్రశంసలు

వాషింగ్టన్: అణు ఒప్పందానికి సాధ్యమైనంత తొందరగా కాంగ్రెస్ ఆమోద ముద్ర వేయించేందుకు తాను తీవ్రంగా కృషి చేస్తున్నట్లు అమెరికా అధ్యక్షుడు జార్జి బుష్ చెప్పారు. 123 ఒప్పందం భారత్ కు సంతృప్తికరంగా ఉండాలనేది తమ ఉద్దేశమని, అది కాంగ్రెస్ ఆమోద ముద్ర పొందాల్సి ఉందని, సాధ్యమైనంత త్వరగా ఆమోదం లభించడానికి తాను పాటు పడుతున్నానని ఆయన అన్నారు. భారత ప్రధాని మన్మోహన్ సింగ్ తో దాదాపు 40 నిమిషాల పాటు చర్చలు జరిపిన అనంతరం ఆయన శ్వేత సౌధంలోని ఓవల్ కార్యాలయంలో విలేకరులతో మాట్లాడారు.

తాము భారత్ తో బలమైన మంచి వ్యూహాత్మక సంబంధాలను ఆశిస్తున్నామని, తాము ఇందుకు విశేషంగా కృషి చేశామని ఆయన అన్నారు. ఆ విధమైన సంబంధాలకు భారత - అమెరికా పౌర అణు ఒప్పందం నిదర్శనమని ఆయన అన్నారు. అమెరికా, భారత్ రెండు దేశాలకు సంతృప్తికరంగా ఉండేలా ఒప్పందం ఆమోదం పొందుతుందని ఆశిస్తున్నట్లు మన్మోహన్ సింగ్ చెప్పారు. బుష్ భారత్ ను, ప్రధాని మన్మోహన్ సింగ్ ను ప్రశంసలతో ముంచెత్తారు. భారత్ గొప్ప దేశమని, బంగారు భవిష్యత్తు ఉన్న దేశమని ఆయన అన్నారు. మన్మోహన్ సింగ్ నాయకత్వాన్ని, మిత్రపూరిత వైఖరిని ఆయన కొనియాడారు.