సంఘీ అరెస్టుకు సోదరుడి డిమాండ్

హైదరాబాద్: తన సోదరుడు, పార్లమెంటు సభ్యుడు గిరీష్ సంఘీని, ఇతరులను అరెస్టు చేయాలని సంఘీ పాలియస్టర్స్ మేనేజింగ్ డైరెక్టర్ సుధీర్ సంఘీ డిమాండ్ చేశారు. గిరీష్ సంఘీ తనపై, తన కుటుంబ సభ్యులపై సంఘీనగర్ లో దాడి చేసినట్లు ఆయన ఆదివారం మీడియా ప్రతినిధుల సమావేశంలో ఆరోపించారు. తన కుటుంబ సభ్యులు ఉషా సంఘీ, స్వాతి సంఘీ, సిద్ధార్థ సంఘీ, అమిత్ సింఘీలతో కలిసి ఆయన మీడియా ప్రతినిధుల సమావేశంలో మాట్లాడారు. తనకు గిరీష్ సంఘీ నుంచి ప్రాణాపాయం ఉందని ముఖ్యమంత్రి డాక్టర్ వైయస్ రాజశేఖర రెడ్డికి, హోం మంత్రి కె. జానారెడ్డికి, డిజిపి ఎస్ ఎస్ పి యాదవ్ లకు విజ్ఞప్తి చేసినా రక్షణ కల్పించలేదని ఆయన విమర్శించారు.

చాలా శక్తివంతుడు కావడంతో గిరీష్ సంఘీపై చర్య తీసుకోవడానికి పోలీసులు, రాష్ట్ర ప్రభుత్వం వెనకాడుతున్నట్లు ఆయన ఆరోపించారు. శనివారంనాడు తన సోదరులు రవి, గిరీష్ లు తన కుటుంబ సభ్యులను హతమార్చడానికి వారి మనుషులను పురమాయించారని, తనకు న్యాయంగా రావాల్సిన 25 శాతం వాటా కన్నా తక్కువ తీసుకోవాలని తనపై ఒత్తిడి తెస్తున్నారని ఆయన అన్నారు. తమ తండ్రి రామశరన్ సంఘీ మరణించినప్పటి నుంచి గత ఆరు నెలలుగా ఆస్తి తగాదాలు సాగుతున్నాయని ఆయన చెప్పారు.