పొత్తులపై చర్చలు వట్టివే: కెసిఆర్

హైదరాబాద్: తాము పొత్తుల కోసం ప్రయత్నిస్తున్నట్లు వస్తున్న వార్తలన్నీ అబద్ధాలేనని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు అన్నారు. తాను ప్రజారాజ్యం పార్టీ అధినేత చిరంజీవితో, తెలుగుదేశం పార్టీ అధినేత నారా చంద్రబాబునాయుడితో చర్చలు జరిపినట్లు వచ్చిన వార్తలు మీడియా సృష్టేనని ఆయన సోమవారంనాడు అన్నారు. తాము పొత్తుల కోసం ఇప్పుడే ప్రయత్నించడం లేదని ఆయన స్పష్టం చేశారు.తెలంగాణ అనుకూల శక్తులతో కలిసి పనిచేస్తామని ఆయన అన్నారు. బిజెపితో కలిసి పని చేసే రోజులు ముందున్నాయని ఆయన చెప్పారు.

ప్రజలే తనకు స్ఫూర్తి అన్నారని, ప్రజల ఆకాంక్షలను మాత్రమే దృష్టిలో ఉంచుకుంటున్నామని, ప్రజలే తనను నడిపిస్తున్నారని, అందువల్ల తాను లాలూచీ పడే ప్రసక్తే లేదని ఆయన అన్నారు. హుజూరాబాద్ శాసనసభ నియోజకవర్గం అభ్యర్థిగా ఈటెల రాజేందర్ పేరును ఆయన ప్రకటించారు. తమ నేత కె. చంద్రశేఖరరావు చిరంజీవి, చంద్రబాబులతో చర్చలు జరిపినట్లు వచ్చిన వార్తలను తెరాస ప్రధాన కార్యదర్శి కె.టి. రామారావు ఖండించారు. కెసిఆర్ వారితో చర్చలు జరపలేదని ఆయన స్పష్టం చేశారు. చిరంజీవి, కెసిఆర్ ల మధ్య చర్చలు జరిగినట్లు ప్రజారాజ్యం పార్టీ ధృవీకరిస్తోంది.