రాఘవులుతో కెసిఆర్ పొత్తు చర్చలు

హైదరాబాద్: సిపిఎం రాష్ట్ర కార్యదర్శి బి.వి.రాఘవులుతో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు మంగళవారం మధ్యాహ్నం చర్చలు జరిపారు. సుదీర్ఘంగా ఈ చర్చలు జరిగాయి. సిపిఎం కార్యాలయంలో ఈ చర్చలు జరిగాయి. అనారోగ్యంతో బాధపడుతున్న రాఘవులును పరామర్శించడానికే వచ్చానని తొలుత చెప్పిన కెసిఆర్ వచ్చే ఎన్నికల్లో రాష్ట్రంలో కాంగ్రెస్ ను ఎలా ఎదుర్కోవాలో తామిద్దరం చర్చించామని చర్చల అనంతరం చెప్పారు. కెసిఆర్ సోమవారం రాత్రి తెలుగుదేశం పార్టీ అధ్యక్షుడు నారా చంద్రబాబునాయుడితో సుదీర్ఘంగా చర్చలు జరిపినట్లు కూడా వార్తలు వచ్చాయి.

తాము ఇంకా సమైక్యాంధ్రకే కట్టుబడి ఉన్నామని రాఘవులు చర్చల అనంతరం చెప్పారు. కాంగ్రెసును ఓడించేందుకు ఎవరితోనైనా పొత్తు పెట్టుకుంటామని ఇరువురు నాయకులు చెప్పారు. తెలంగాణపై సానుకూల వైఖరి తీసుకోవాలని కెసిఆర్ రాఘవులును కోరారు. తాము తెలంగాణకు అడ్డంకి కాదని ఇంతకు ముందు సిపిఎం ప్రధాన కార్యదర్శి ప్రకాష్ కారత్ చెప్పిన నేపథ్యంలో ఈ భేటీ జరిగిందని భావిస్తున్నారు. ఇంతకు ముందు కెసిఆర్ సిపిఐ రాష్ట్ర కార్యదర్శి కె. నారాయణతో కూడా కెసిఆర్ చర్చించారు. మూడో కూటమి ప్రస్తావన లేకుండా రాఘవులుతో కెసిఆర్ చర్చలు జరిగినట్లు సమాచారం. దాదాపు గంట పాటు వీరద్దరి మధ్య చర్చలు జరిగాయి.

వామపక్షాలు కలిసి ఉండాలని, కాంగ్రెసును ఓడించడానికి రెండు వామపక్షాలు కలిసి ఉండాలని తాము కోరుకుంటున్నామని కెసిఆర్ రాఘవులుతో చెప్పారు. తాము కూడా అదే కోరుకుంటున్నామని, కాంగ్రెసును ఓడించడమే తమ ప్రధాన లక్ష్యమని రాఘవులు కెసిఆర్ తో చెప్పినట్లు తెలుస్తోంది.