రెండు పేలుళ్లు: 8 మంది మృతి

ముంబయి: మహారాష్ట్ర, గుజరాత్ రాష్ట్రాల్లో జరిగిన బాంబు పేలుళ్లలో 8 మంది మరణించారు. 30 మందికి పైగా గాయపడ్డారు. మహారాష్ట్రలోని మాలేగావ్ లో బాంబు పేలి ఆరుగురు మరణించారు. 20 మంది దాకా గాయపడ్డారు. సోమవారం రాత్రి ఈ సంఘటన జరిగింది. పేలిన బాంబు తీవ్రత తక్కువగా ఉండడంతో ప్రమాదం తక్కువ స్థాయిలో ఉంది. మోటార్ సైకిల్ పై బాంబును పెట్టారు. రంజాన్ కోసం ప్రజలు షాపింగ్ చేస్తుండగా ఈ పేలుడు సంభవించింది. పేలుడుతో ఒక్కసారిగా ఉద్రిక్తత నెలకొంది. పరిస్థితిని అదుపులోకి తేవడానికి పోలీసులు గాలిలోకి కాల్పులు జరిపారు.

ఇదిలా వుంటే, గుజరాత్ రాష్ట్రంలోని సబర్ కాంతా జిల్లా మొదస్సా పట్టణంలో జరిగిన పేలుడులో ఇద్దరు మరణించారు. మొదస్సాలో పేలుడు సంభవించిందని, పేలుడుకు కారణాలపై దర్యాప్తు చేస్తున్నామని జిల్లా పోలీసు సూపరింటిండెంట్ ఆర్.బి. బ్రహ్మభట్ చెప్పారు. మోటార్ సైకిల్ పై బాంబు పెట్టి టైమర్ తో పేల్చారు. మైనారిటీలు అధికంగా ఉండే ప్రాంతంలో ఈ పేలుడు సంభవించింది. ఈ బాంబు పేలుడు ఢిల్లీలోని మెహరౌలీలోని బాంబు పేలుడుతో పోలిక ఉంది.