అద్వానీ తెలంగాణ ఇస్తామన్నారు: కెసిఆర్

హైదరాబాద్: తాము అధికారంలోకి రాగానే తెలంగాణ రాష్ట్రం ఇస్తామని భారతీయ జనతా పార్టీ (బిజెపి) అగ్రనేత అద్వానీ తనతో చెప్పినట్లు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు తెలిపారు. గతంలో తాను అద్వానీతో జరిపిన చర్చల వివరాలను ఆయన బుధవారం కార్యకర్తల శిక్షణా శిబిరంలో వెల్లడించారు. తాము గతంలో తెలుగుదేశం పార్టీ అభ్యంతర పెట్టడం వల్ల తెలంగాణ రాష్టాన్ని, శివసేన అడ్డు చెప్పడం వల్ల విదర్భ రాష్ట్రాన్ని ఇవ్వలేకపోయినట్లు అద్వానీ చెప్పారని ఆయన అన్నారు. ఈసారి తాము తప్పకుండా అదికారంలోకి వస్తామని చెబుతూ తెలంగాణ రాష్ట్రం ఇస్తామని అద్వానీతో తనకు హామీ ఇచ్చినట్లు ఆయన తెలిపారు.

తెలంగాణ రాష్ట్రం ఏర్పాటు అంశాన్ని తమ పార్టీ ఎన్నికల ప్రణాళికలో చేరుస్తామని, అంతేకాకుండా జాతీయ ప్రజాస్వామ్య కూటమి (ఎన్జీయే) ఎన్నికల ప్రణాళికలో కూడా చేరుస్తామని అద్వానీ తనకు చెప్పినట్లు కెసిఆర్ తెలిపారు. తాను ఇతర పార్టీలతో జరిపిన చర్చల వివరాలను దాచుకోవాలని అనుకోవడం లేదని, తెలంగాణకు ఏ ఆటంకాలన్నీ తొలగిపోతున్నాయని ఆయన అన్నారు. ప్రస్తుతం అన్ని పార్టీలు తెలంగాణ గురించి మాట్లాడుతున్నాయని, అలా మాట్లాడాల్సిన అనివార్యత రాజకీయ పార్టీలకు ఏర్పడిందని, ఇది కార్యకర్తల విజయమని ఆయన అన్నారు.