24న బాలకృష్ణ యువగర్జన

హైదరాబాద్: గుంటూరులో ఈ నెల 24వ తేదీన నందమూరి హీరో బాలకృష్ణ యువగర్జన సదస్సు జరుగుతుందని తెలుగుదేశం పార్టీ అధ్యక్షుడు నారా చంద్రబాబు నాయుడు బుధవారం మీడియా ప్రతినిధుల సమావేశంలో చెప్పారు. ఈ సదస్సులు బాలకృష్ణతో పాటు జూనియర్ ఎన్టీఆర్, కళ్యాణ్ రామ్, తారకరత్న పాల్గొంటారు. అవినీతిపై యుద్ధం చేయాల్సింది యువతేనని, అందువల్ల ఈ సదస్సు అవినీతిపై యుద్ధం ప్రకటిస్తుందని చంద్రబాబు చెప్పారు. తాను మహాత్మా గాంధీ జయంతి సందర్భంగా ఈ నెల 2వ తేదీ నుంచి అవినీతికి వ్యతిరేకంగా ఉద్యమం చేస్తానని, ఈ ఉద్యమాన్ని ఎల్లంపల్లి ప్రాజెక్టు నుంచి రేపు ఉదయం ప్రారంభిస్తానని ఆయన చెప్పారు. గ్రామస్థాయి నుంచి రాజధాని వరకు అవినీతి పేరుకుపోయి ఉందని ఆయన అన్నారు. ప్రభుత్వ అవినీతిపై తమ పోరాటాన్ని ఉధృతం చేస్తామని ఆయన చెప్పారు.

అవినీతి వల్ల ప్రజాస్వామ్యం కుప్పకూలుతుందని ఆయన అన్నారు. అవినీతి వల్ల అభివృద్ధి కుంటుపడుతుందని ఆయన అన్నారు. తెలంగాణపై కోర్ కమిటీ అభిప్రాయాలు సేకరించిందని, ఈ విషయంపై పార్టీ నిర్ణయం తీసుకుంటుందని ఆయన చెప్పారు. తాము తెలంగాణకు వ్యతిరేకం కాదని ఇప్పటికే చెప్పినట్లు ఆయన గుర్తు చేశారు. కోర్ కమిటీకి విషయాన్ని అప్పగించిన తర్వాత ఆ విషయంపై పదే పదే అడగడం సబబు కాదని ఆయన విలేకరుల ప్రశ్నలకు సమాధాంగా చెప్పారు.