రేపు గంగదేవిపల్లికి చిరు: 9నుంచి యాత్ర

హైదరాబాద్: ప్రజారాజ్యం అధినేత చిరంజీవి తొలి విడత రాష్ట్ర పర్యటన ఖరారైంది. ఈ పర్యటన వివరాలను పార్టీ అధికార ప్రతినిధులు పరకాల ప్రభాకర్, డాక్టర్ మిత్రా బుధవారం మీడియా ప్రతినిధుల సమావేశంలో వెల్లడించారు. చిరంజీవి ఈ నెల 9వ తేదీన శ్రీకాకుళం జిల్లా ఇచ్చాపురం నుంచి తన పర్యటనను ప్రారంభమైంది. అరసవిల్లి సూర్యదేవాలయంలో ప్రార్థనలు చేసి ఈ యాత్రను మొదలు పెడతారు. తొమ్మిది రోజుల పాటు శ్రీకాకుళం, విజయనగరం, విశాఖపట్నం జిల్లాల్లో ఈ పర్యటన సాగుతుంది. చిరంజీవి భద్రత కోసం 600 మందిని నియోగించినట్లు వారు తెలిపారు.

కాగా, రేపు గురువారం ఆయన వరంగల్ జిల్లా గీసుకొండ మండలం గంగదేవిపల్లిని సందర్శిస్తారు. గంగదేవిపల్లి ఉత్తమ గ్రామ పంచాయతీగా జాతీయ అవార్డును పొందింది. రేపటి నుంచి ప్రజారాజ్యం పార్టీ ఊరూరా ప్రజారాజ్యం కార్యక్రమం ప్రారంభమవుతుంది. ఇందులో భాగంగా పార్టీ పతాకావిష్కరణ కార్యక్రమం, సభ్యత్వ నమోదు కార్యక్రమం ప్రారంభమవుతాయి. రేపు ఉదయం ఆయన హైదరాబాదులో చిరంజీవి పార్టీ పతాకను ఆవిష్కరించి, బాలకృష్ణ అనే వికలాంగుడికి తొలి పార్టీ సభ్యత్వం ఇచ్చి. తర్వాత తాను తీసుకుంటారు. ఆ తర్వాత గంగదేవిపల్లికి బయలుదేరి వెళ్తారు.