వర్మ చేతికి బాలిక గోర్లు, వెంట్రుకలు

హైదరాబాద్: చేతబడి ఇతివృత్తంగా రక్ష సినిమాను నిర్మించిన దర్శక నిర్మాత రామ్ గోపాల్ వర్మకు జన విజ్ఞాన వేదిక ఒక బాలిక గోర్లు, వెంట్రుకలు పంపించింది. చేతనైతే వాటి ఆధారంగా చేతబడి చేయాలని సవాల్ విసురుతూ జన విజ్ఞాన వేదిక వాటిని వర్మకు బుధవారం పంపించింది. బాలిక ఇష్టప్రకారమే జనవిజ్ఞాన వేదిక ఆ గోర్లు, వెంట్రుకలు సేకరించినట్లు వేదిక ప్రతినిధులు చెప్పారు. చేతబడి అశాస్త్రీయమని, చేతబడి ఉన్నట్లు రుజువు చేయాలని వేదిక ఇంతకు ముందు వర్మకు సవాల్ విసిరింది. ఎలా నిరూపించాలో చెప్పండంటూ వర్మ వారి సవాల్ కు జవాబుగా అన్నారు. దాంతో వేదిక బుధవారం బాలిక గోర్లు, వెంట్రుకలు పంపించింది.

తనకు చేతబడిపై నమ్మకం లేదని గోర్లు, వెంట్రుకలు ఇచ్చిన బాలిక చెప్పింది. తనకు చేతబడి చేయాలని వర్మను సవాల్ చేస్తున్నానని ఆ బాలిక అన్నది. చేతబడి ఉందని నిరూపిస్తే తాము పది లక్షల రూపాయలు ఇస్తామని వేదిక ఇంతకు ముందు చెప్పింది. జగపతిబాబు, కళ్యాణి జంటగా రామ్ గోపాల్ వర్మ రక్ష సినిమాను నిర్మించారు. చేతబడి ఇతివృత్తంగా ఈ సినిమా నిర్మితమైంది. ఈ సినిమాకు ఆకెళ్ల వంశీకృష్ణ దర్శకుడు.