తెలంగాణకు తెలుగుదేశం సై

హైదరాబాద్: తెలంగాణపై కోర్ కమిటీ ఇచ్చిన నివేదికపై తెలుగుదేశం పార్టీ పోలిట్ బ్యూరో రేపు (మంగళవారం) చర్చించి నిర్ణయం తీసుకుంటుంది. తన నివేదికను కోర్ కమిటీ సోమవారం పార్టీ అధ్యక్షుడు నారా చంద్రబాబునాయుడుకు సోమవారం సమర్పించింది. కోర్ కమిటీ సభ్యులతో చంద్రబాబు విస్తృతంగా చర్చలు జరిపారు. తెలంగాణకు అనుకూలంగా ఇప్పటికే సంకేతాలిచ్చిన తెలుగుదేశం పార్టీ రేపు అధికారికంగా ఆ దిశలో నిర్ణయం తీసుకుంటుంది. తెలంగాణ రాష్ట్ర సమితి (తెరాస)తో పొత్తుపై కూడా రేపటి పోలిట్ బ్యూరో సమావేశంలో చర్చించే అవకాశం ఉంది. తెరాస పొత్తు పెట్టుకుంటే తెలంగాణ రాష్ట్రం ఏర్పాటుకు ఉద్యమం చేపట్టాలా, వద్దా అనే విషయంపై కూడా తెలుగుదేశం పార్టీ పోలిట్ బ్యూరో రేపటి సమావేశంలో చర్చిస్తుంది.

తెలుగుదేశం కోర్ కమిటీ సభ్యులు పార్టీ నాయకుల నుంచి, శ్రేణుల నుంచి అభిప్రాయాలను సేకరించి, వాటిని పరిశీలించి నివేదికను రూపొందించారు. అభిప్రాయ సేకరణలో చాలా వరకు తెలంగాణకు అనుకూలంగా అభిప్రాయం వ్యక్తమైంది. దీంతో తెలంగాణకు అనుకూలంగా నిర్ణయం తీసుకోవడానికి తెలుగుదేశం పార్టీకి అడ్డంకులన్నీ తొలిగినట్లైంది. తెలంగాణకు అనుకూలంగా అధికారిక నిర్ణయం ప్రకటించగానే తెలుగుదేశం పార్టీ వచ్చే ఎన్నికల కోసం తెరాసతో పొత్తును ఖరారు చేసుకునే అవకాశం ఉంది. ప్రజారాజ్యం పార్టీ కన్నా ముందే పొత్తులు ఖరారు చేసుకోవాలనే ఉద్దేశంతో తెలుగుదేశం పార్టీ ముందుకు కదులుతున్నట్లు కనిపిస్తున్నది.