చంద్రబాబుకు కెసిఆర్ అభినందనలు

హైదరాబాద్‌: తెలంగాణ రాష్ట్రం ఏర్పాటుకు అనుకూలంగా తెలుగుదేశం పార్టీ నిర్ణయం తీసుకున్నందుకు టిఆర్‌ఎస్‌ అధ్యక్షుడు కె. చంద్రశేఖరరావు శుక్రవారం చంద్రబాబుకు ఫోన్‌ చేసి అభినందనలు తెలిపారు. ఇంతవరకు తెలంగాణను వ్యతిరేకించిన టిడిపి ఈ రోజు తీసుకున్న నిర్ణయం హర్షదాయకమని, అది ప్రజాభిప్రాయమని ప్రతి ఒక్కరూ ఆమోదించి తీరాలని కెసిఆర్‌ అన్నారు.

టిడిపి నిర్ణయంపై టిఆర్‌ఎస్‌ నాయకులు హర్షం వ్యక్తం చేశారు. దీనిపై రాజకీయంగా వస్తున్న విమర్శలను తిప్పికొట్టారు. అన్ని ప్రాంతాల ప్రజల అభిప్రాయాలు తెలుసుకున్న తర్వాతే తెలుగుదేశం ఈ నిర్ణయం తీసుకుందని, దీనిపై రాజకీయ రంగు పులమరాదని కెసిఆర్‌ అన్నారు. ఇకనైనా కాంగ్రెస్‌ ప్రభుత్వం తప్పు తెలుసుకుని వచ్చే పార్లమెంటు సభలో తెలంగాణపై బిల్లు ప్రవేశపెట్టాలని ఆయన అన్నారు.