చిరు మద్దతు తీసుకుంటాం: వెంకయ్య

హైదరాబాద్: కేంద్రంలో ప్రజారాజ్యం అధినేత చిరంజీవి తమకు ఇస్తామంటే తీసుకుంటామని భారతీయ జనతా పార్టీ (బిజెపి) సీనియర్ నేత ఎం. వెంకయ్యనాయుడు అన్నారు. కేంద్రంలో ఎవరు మద్దతిస్తామన్నా తీసుకుంటామని ఆయన ఆదివారం మీడియా ప్రతినిధుల సమావేశంలో అన్నారు. ఎన్నికల అనంతరం కేంద్రంలో చిరంజీవి పార్టీ తమకు మద్దతిచ్చే విషయంపై ఎటువంటి ప్రతిపాదనలు లేవని ఆయన చెప్పారు. రాష్ట్రంలో సంకీర్ణమే వస్తుందని ఆయన అభిప్రాయపడ్డారు.

రాష్ట్రంలో కాంగ్రెస్ 230 సీట్లు గెలుచుకుంటుందని ముఖ్యమంత్రి డాక్టర్ వైయస్ రాజశేఖర రెడ్డి అనడాన్ని ఆయన ఎద్దేవా చేశారు. మిగిలిన 64 సీట్లు ఎవరికిస్తారని ఆయన వ్యంగ్యంగా అన్నారు. సిపిఎం, సిపిఐ, మావోయిస్టులు, తెరాస, ఉద్యోగ వర్గాలు ఎవరూ ఇప్పుడు కాంగ్రెస్ వెంట లేరని, ఈ పరిస్థితిలో కాంగ్రెస్ గెలుస్తుందని చెప్తే నమ్మే అమాయకత్వం ఎవరికీ లేదని ఆయన అన్నారు.