సిట్టింగ్ జడ్జి విచారణకు బాబు డిమాండ్

ఆదిలాబాద్: ఆదిలాబాద్ జిల్లా భైంసా సమీపంలోని వటోలి గ్రామంలో ఆరుగురు సజీవ దహనమైన సంఘటనపై సిట్టింగ్ న్యాయమూర్తితో విచారణ జరిపించాలని తెలుగుదేశం పార్టీ అధ్యక్షుడు నారా చంద్రబాబునాయుడు డిమాండ్ చేశారు. ఒకే కుటుంబంలో ఆరుగురు సజీవదహనం అయిన బైంసా మండలంలోని వటోలి గ్రామాన్ని సోమవారం టీడీపీ అధ్యక్షుడు చంద్రబాబునాయుడు సందర్శించారు. ఈ సంఘటన వివరాలను అడిగి తెలుసుకున్నారు. అల్లర్ల బాధితులను ఓదార్చారు. శాంతి భద్రతల వైఫల్యంపై ఆయన తీవ్రంగా ధ్వజమెత్తారు. దేశవ్యాప్తంగా మత ఘర్షణలు, అల్లర్లు అన్ని రాష్ట్రాల్లో పెరిగిపోయాయని ఇందుకు కేంద్ర, రాష్ట్ర ప్రభుత్వాల అసమర్థతే కారణమని ఆయన నిందించారు. మృతుల కుటుంబాలకు ఆయన 40 వేల రూపాయలు అందజేశారు. మృతుల కుటుంబాలకు పది లక్షల రూపాయలేసి నష్టపరిహారం చెల్లించాలని ఆయన డిమాండ్ చేశారు.

రాష్ట్రంలో పూర్తిగా ఆటవిక రాజ్యం కొనసాగుతోందని, రౌడీమూకలు స్వైరవిహారం చేస్తున్నాయని టీడీపీ అధ్యక్షుడు చంద్రబాబునాయుడు అంతకు ముందు నిజామాబాద్ లో విమర్శించారు. ఒకే ఇంట్లో నిద్రిస్తున్న ఆరుగురు కుటుంబసభ్యులను సజీవదహనం చేశారంటే రాష్ట్రంలో శాంతిభద్రతల పరిస్థితి ఎలా ఉందో తెలుస్తోందని ఆయన అన్నారు. బైంసాలోని వటోలి గ్రామంలో బాధితులను పరామర్శించేందుకు వెళుతున్న ఆయన దారిలో నిజామాబాద్‌లో మీడియాతో మాట్లాడారు. ఓ వైపు రాష్ట్రం అల్లరిమూకల ఆగడాలతో అట్టుడుకుతుంటే ముఖ్యమంత్రి జాతీయభద్రతా సమావేశాల్లో తమ రాష్ట్రాన్ని రోల్‌మోడల్‌గా చిత్రీకరించుకుని పొగడ్తలు పొందే ప్రయత్నం చేస్తున్నారని అన్నారు.