కెసిఆర్ పై దేవేందర్ గౌడ్ ధ్వజం

హైదరాబాద్: వచ్చే ఎన్నికల్లో సమైక్యవాదులతో జతకట్టి తెలంగాణ ఎలా సాధిస్తారని నవ తెలంగాణ ప్రజాపార్టీ నేత టి. దేవేందర్ గౌడ్ ప్రశ్నించారు. సిపిఎంతో పొత్తు పెట్టుకోవడానికి తెలంగాణ రాష్ట్ర సమితి ప్రయత్నిస్తుండడంపై ఆయన సోమవారం మీడియా ప్రతినిధుల సమావేశంలో ఆ ప్రశ్న వేశారు. సమైక్యవాదులతో పొత్తుల కోసం ప్రయత్నిస్తూ తెలంగాణ రాష్ట్ర సమితి తెలంగాణవాదుల ఐక్యతను దెబ్బ తీస్తున్నారని ఆయన విమర్శించారు. తాము తెలంగాణ శక్తుల ఏకీకరణకు సిద్ధమని పలుమార్లు చెప్పామని, అయినా తెలంగాణ రాష్ట్ర సమితి పట్టించుకోవడం లేదని ఆయన అన్నారు.

వచ్చే ఎన్నికల తర్వాత హంగ్ అసెంబ్లీ ఏర్పడుతుందని, అది తెలంగాణకు ఎంతో మేలు చేస్తుందని ఆయన అన్నారు. హంగ్ అసెంబ్లీ ఏర్పడితే తెలంగాణ సమస్యకు పరిష్కారం లభిస్తుందని ఆయన అన్నారు. ఇది తెలంగాణకు సువర్ణావకాశమని ఆయన అన్నారు. వచ్చే ఎన్నికల్లో కాంగ్రెస్ పార్టీ భూస్థాపితం అవుతుందని ఆయన అన్నారు. ముఖ్యమంత్రి డాక్టర్ వైయస్ రాజశేఖర రెడ్డిని నమ్ముకుని కాంగ్రెస్ పార్టీ తెలంగాణ రాష్ట్ర ఏర్పాటుకు ముందుకు రాకపోతే భూస్థాపితం కావడం ఖాయమని ఆయన అన్నారు. తెలంగాణకు అనుకూలంగా ఉండే పార్టీలతో తాము పొత్తులకు సిద్ధమని ఆయన చెప్పారు.