టిడిపిని విమర్శిస్తే సహించం: కెసిఆర్

నిజమాబాద్‌ : తెలంగాణకు అనుకూలంగా నిర్ణయం తీసుకున్న తెలుగుదేశం పార్టీని విమర్శిస్తే సహించబోమని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కాంగ్రెస్ పార్టీని హెచ్చరించారు. రానున్న పార్లమెంటు సమావేశాల్లో ప్రత్యేక తెలంగాణ బిల్లును వెంటనే ప్రవేశపెట్టాలని చంద్రశేఖరరావు డిమాండ్‌ చేశారు. తెలంగాణకు మద్దతు ప్రకటించిన చంద్రబాబుపై విమర్శలు చేయడాన్ని ఆయన ఖండించారు. తెలంగాణపై అధ్యయనం చేసిన తెలుగుదేశం మద్దతు ప్రకటిస్తే తప్పేముందని ఆయన ప్రశ్నించారు. చిరంజీవి పార్టీ పెడితే కాంగ్రెస్‌కు ఎందుకు అభ్యంతరమని ఆయన అన్నారు. పార్టీ పెట్టకుండా ఉండటానికి ఇదేమైనా కాంగ్రెస్‌ జాగీరా అని మండిపడ్డారు.

విద్యుత్ సమస్యలకు నిరసనగా తెలంగాణ రాష్ట్ర సమితి సోమవారం అన్ని జిల్లాల్లో ధర్నా కార్యక్రమాలు చేపట్టింది. నిజామాబాద్ జిల్లాలో జరిగిన ధర్నా కార్యక్రమంలో కెసిఆర్ పాల్గొన్నారు. ఈ సందర్భంగా ఆయన కాంగ్రెస్ పార్టీపై తీవ్ర విమర్శలు చేశారు. తెలంగాణ రాష్ట్ర విషయంలో హామీ ఇచ్చిన కాంగ్రెస్ మోసం చేసిందని ఆయన అన్నారు. తెరాస ఆందోళనా కార్యక్రమంలో సిపిఐ కార్యకర్తలు కూడా పాల్గొన్నారు.