దాస్ మున్షీ ఆరోగ్యం ఆందోళనకరం

న్యూఢిల్లీ: సమాచార, బ్రాడ్ కాస్టింగ్ మంత్రి ప్రియరంజన్ దాస్ మున్షీ ఆరోగ్య పరిస్థితి ఆందోళనకరంగా ఉంది. తీవ్రమైన గుండె సమస్యతో ఆయనను సోమవారంనాడు అఖిల భారత వైద్య విజ్ఞాన సంస్థలో చేర్చారు. ఆయనను ఇంటెన్సివ్ కేర్ యూనిట్ (ఐసియు)లో చేర్చారు. ప్రియరంజన్ దాస్ ఆరోగ్యాన్ని పరిశీలిస్తున్నామని, వచ్చే కొన్ని గంటల వరకు ఏమీ చెప్పలేమని ఎయిమ్స్ అధికార ప్రతినిధి వైకె గుప్తా చెప్పారు.

62 ఏళ్ల దాస్ మున్షీని సోమవారం తెల్లవారు జామున రెండున్నర గంటల ప్రాంతంలో ఎయిమ్స్ చేర్చారు. శ్వాస సంబంధమైన సమస్యతో పాటు ఊపిరితిత్తుల సమస్యతో ఆయన బాధపడుతున్నారు. ఆయనను ఐసియులో వెంటిలేటర్ పై ఉంచారు. గత మూడు నెలల్లో ఆయనకు గుండె పోటు రావడం ఇది రెండో సారి. కోల్ కత్తాలో ఆయనకు జులైలో ఆంజియోప్లాస్టీ జరిగింది. కీలకమైన శరీరాంగాలు నిలకడగా పనిచేస్తున్నాయని, అయితే పరిస్థితి ఆందోళనకరంగానే ఉందని వైద్యులు చెప్పారు.