చంద్రబాబుది అవకాశవాదం: వైయస్

హైదరాబాద్: తెలంగాణకు అనుకూలంగా తెలుగుదేశం పార్టీ నిర్ణయం తీసుకోవడం పచ్చి అవకాశవాదమని ముఖ్యమంత్రి డాక్టర్ వైయస్ రాజశేఖర రెడ్డి వ్యాఖ్యానించారు. ఒక తెలుగు టీవీ చానెల్ కార్యక్రమంలో ఆయన ఆ వ్యాఖ్య చేశారు. ఓట్ల కోసం తెలుగుదేశం పార్టీ అధ్యక్షుడు నారా చంద్రబాబు నాయుడు తెలంగాణకు అనుకూలంగా నిర్ణయం తీసుకున్నారని ఆయన అన్నారు. అధికారం కోసం చంద్రబాబు బిజెపితోనైనా కలుస్తారని ఆయన అన్నారు. రాజకీయంలో చంద్రబాబుది అవకాశవాద రాజకీయమని ఆయన అన్నారు.

రాజకీయ పార్టీకి ఒక విధానం ఉండాలని, తెలుగుదేశం పార్టీ ఒక విధానం ప్రకారం నడుచుకోవడం లేదని ఆయన అన్నారు. తెలంగాణ అంశం తమ కాంగ్రెస్ పార్టీ అధిష్ఠాన వర్గం వద్ద సజీవంగానే ఉందని ఆయన చెప్పారు. తెలంగాణపై తమ పార్టీ అధిష్ఠానవర్గం సరైన సమయంలో సరైన నిర్ణయం తీసుకుంటుందని ఆయన చెప్పారు. తాము తెలంగాణ అంశాన్ని వదిలేయలేదని ఆయన చెప్పారు.