పోలీసు కాల్పులపైనా విచారణ: జానా

హైదరాబాద్: ఆదిలాబాద్ జిల్లా భైంసాలో అల్లర్లను అరికట్టడంలో పోలీసుల వైఫల్యం ఏమైనా ఉందా అనే విషయంపై ఇద్దరు పోలీసు అధికారులు దర్యాప్తు చేస్తున్నారని రాష్ట్ర హోం మంత్రి కె. జానారెడ్డి చెప్పారు. భైంసాలో పోలీసు కాల్పులపై కూడా విచారణ సాగుతోందని, విచారణ పూర్తయిన తర్వాత అన్ని విషయాలు వెల్లడిస్తామని ఆయన గురువారం మీడియా ప్రతినిధులతో చెప్పారు. పోలీసులు గాలిలోకి కాల్పులు జరిపినట్లు తనకు ప్రాథమికంగా సమాచారం అందిందని, అదే విషయాన్ని తాను విలేకరులకు చెప్పానని ఆయన అన్నారు.

అయితే పోలీసు కాల్పుల విషయంలో విషయంలో అనేక ఆరోపణలు వస్తున్నాయని, దాంతో విచారణకు ఆదేశించామని ఆయన చెప్పారు. పోస్టుమార్టం నివేదిక అందినపప్పటికీ ఫోరెన్సిక్ నివేదిక అందాల్సి ఉందని, శాస్త్రీయమైన దర్యాప్తు పూర్తయిన తర్వాతనే ఏమైనా చెప్పగలనని ఆయన అన్నారు. విచారణ పూర్తి కాకుండా చెప్పడం వల్ల ఉపయోగం లేదని ఆయన అన్నారు. ప్రతి ఆరోపణకూ ప్రతిస్పందించాల్సిన అవసరం లేదని, విచారణ పూర్తి కాకుండా సగం సగం విషయాలు చెప్పడం సరైంది కాదని ఆయన అన్నారు. న్యాయవిచారణ కూడా జరుగుతోందని, అది కూడా పూర్తయి నివేదిక అందాల్సి ఉందని ఆయన అన్నారు.