తెలంగాణపై అమ్మను అడుగుతా: ఎమ్మెస్సార్

కరీంనగర్: తెలంగాణ రాష్ట్రం ఇస్తామని స్పష్టమైన ప్రకటన చేయాలని తాను తమ పార్టీ అధ్యక్షురాలు సోనియా గాంధీని కోరుతానని కాంగ్రెస్ సీనియర్ శాసనసభ్యుడు ఎం. సత్యనారాయణ రావు అన్నారు. అందుకు తాను రెండు మూడు రోజుల్లో ఢిల్లీ వెళ్తానని, తెలంగాణ రాష్ట్రం ఇస్తామని ప్రకటన చేయాలని సోనియా గాంధీకి విజ్ఞప్తి చేస్తానని ఆయన గురువారం మీడియా ప్రతినిధులతో చెప్పారు.

తెలంగాణ రాష్ట్రం ఏర్పాటుకు అనుకూలంగా సోనియా గాంధీ స్పష్టమైన ప్రకటన చేయకపోతే వచ్చే ఎన్నికల్లో కాంగ్రెస్ నష్టపోతుందని ఆయన అన్నారు. తెలంగాణ రాష్ట్రం ఇస్తామని ప్రకటిస్తే పార్టీ ప్రతిష్ట పెరుగుతుందని ఆయన అన్నారు. సోనియా తెలంగాణ ఇస్తామని చెప్తే చాలునని ఆయన అన్నారు.