అల్లర్ల బాధ్యులను శిక్షిస్తాం: వైయస్

ఆదిలాబాద్: భైంసా, వట్టోలీల్లో అల్లర్లకు బాధ్యులైనవారిని కఠినంగా శిక్షిస్తామని ముఖ్యమంత్రి డాక్టర్ వైయస్ రాజశేఖర రెడ్డి చెప్పారు. ఆయన గురువారంనాడు ఆదిలాబాద్ జిల్లా వట్టోలీ గ్రామాన్ని సందర్శించారు. వట్టోలీలో ఆరుగురు వ్యక్తుల సజీవదహనం జరిగిన విషయం తెలిసిందే. అల్లర్లకు బాధ్యులైనవారిని వదిలిపెట్టబోమని ఆయన చెప్పారు. బాధ్యులపై చట్టపరమైన చర్యలు తీసుకుంటామని ఆయన చెప్పారు. సిబిఐ దర్యాప్తు జరిపిస్తామని ఆయన అన్నారు. తప్పు చేసినవారిని ఎవరినీ వదిలిపెట్టబోమని ఆయన చెప్పారు. మైనారిటీలకు ఈ దేశంలో జీవించే హక్కు ఉందని ఆయన చెప్పారు.

అల్లర్ల వల్ల 2 కోట్ల 43 లక్షల రూపాయల నష్టం వాటిల్లిందని, ఈ నష్టాన్ని ప్రభుత్వం పూర్తిగా భరిస్తుందని ఆయన చెప్పారు. మృతుల కుటుంబాలకు ఐదు లక్షల రూపాయలేసి నష్టపరిహారం చెల్లిస్తామని ఆయన చెప్పారు. దాడులకు దిగి గాయపడినవారికి నష్టపరిహారం అందదని ఆయన అన్నారు. అమాయకులకు మాత్రమే నష్టపరిహారం అందుతుందని ఆయన చెప్పారు. కర్ఫ్యూ వల్ల బాధపడుతున్న ప్రజలకు బియ్యం, ఇతర నిత్యావసర సరుకులు ఇస్తామని ఆయన చెప్పారు.